Deis d’Ealaíontóirí: Deiseanna Maoiniúcháin le haghaidh Ealaíontóirí i Scoileanna Fógartha do Chontae Chorcaí

Seirbhís Ealaíne Chomhairle Contae Chorcaí
Spriocdháta: 9 Eanáir 2025

D’fhógair Comhairle Contae Chorcaí sonraí na ndeiseanna maoiniúcháin do 2025 d’earnáil Ealaíon an chontae. Tá Seirbhís Leabharlainne agus Ealaíne na Comhairle ag iarraidh tograí maidir le tionscadail, gníomhaíochtaí agus imeachtaí ealaíon a bheidh ar siúl i gContae Chorcaí in 2025 a d’fhéadfadh a bheith incháilithe do mhaoiniúchán faoi réimse scéimeanna cúnaimh deontais atá ag glacadh le hiarratais anois.

I measc na gcistí a fógraíodh tá an Scéim Deontas Ealaíon a thacóidh le heagraíochtaí ealaíon agus an earnáil dheonach gníomhaíocht ealaíon a sholáthar, clár chun tacú le healaíontóirí a bheith ag obair i scoileanna, tacaíocht d’fhorbairt tionscadal ealaíon trí mheán na Gaeilge, agus deiseanna sparánachta agus cónaitheachta d’ealaíontóirí gairmiúla i ngach disciplín.

Agus é ag fógairt na ndeiseanna maoiniúcháin, dúirt Méara Chontae Chorcaí, an Comhairleoir Joe Carroll: “Bronnadh €166,000 san iomlán trínár Scéimeanna Deontas Ealaíon in 2024, a thug tacaíocht ríthábhachtach do 131 faighteoir, a raibh sé tuillte go maith acu. Cabhraíonn ár n-earnáil Ealaíon le pobail a chothú, tacaíonn sí leis an gcomhtháthú sóisialta agus cuireann sí feabhas ar shaol ár saoránach. Leis na scéimeanna seo, ba mhaith linn tacú le healaíontóirí agus eagraíochtaí ealaíon, agus cúnamh a sholáthar d’fhéilte, taibhithe agus taispeántais áitiúla, chomh maith le cláir chultúrtha áitiúla eile a bheadh ar fáil don phobal, agus is oibrithe deonacha a chuireann roinnt mhaith de na himeachtaí sin ar siúl.”

Scéim Deontas Ealaíon

Soláthraíonn Scéim Deontas Ealaíon Chomhairle Contae Chorcaí deontais do dhaoine aonair agus d’eagraíochtaí chun gníomhaíochtaí, tionscadail agus imeachtaí ealaíon i gContae Chorcaí a chur ar siúl agus a chur chun cinn. Féadfar deontais a dhámhachtain i gcás ina gcomhlíonann an t-iarratas na haidhmeanna agus na cuspóirí, agus na critéir incháilitheachta a leagtar amach sna treoirlínte seo. Déanfar na hiarratais a mheas de réir na físe ealaíonta, na huaillmhéine, an tionchair fhéideartha ar an lucht féachana agus ealaíontóirí, agus na hindéantachta. Léigh tuilleadh anseo: Scéim Deontas Ealaíon

An Scéim Ealaíontóirí i Scoileanna

Is é is cuspóir don scéim Ealaíontóirí i Scoileanna a chur ar chumas scoláirí bunscoile agus iar-bhunscoile agus na foirne teagaisc obair a dhéanamh i bpáirt le healaíontóir ar thionscadal cruthaitheach le linn tréimhse shínithe.

Tugann an scéim deis do scoileanna tionscadal a dhéanamh, ina ndíríonn na torthaí ealaíonta agus foghlama ar chothú shamhlaíocht chruthaitheach na scoláirí, a gcuid smaointeoireachta criticiúla, agus scileanna na foirne teagaisc atá páirteach. Léigh tuilleadh anseo: An Scéim Ealaíontóirí i Scoileanna

Seisiúin Eolais

Tá dhá sheisiún eolais sceidealaithe dóibh siúd a bhfuil spéis acu cur isteach ar an scéim. Beidh an chéad cheann ar siúl ar an 22 Samhain agus cumhdófar an Scéim Deontas Ealaíon (gníomhaíocht, tionscadail agus imeachtaí ealaíon le daoine aonair nó eagraíochtaí). Cumhdóidh an dara seisiún Dé hAoine, 29 Samhain, Sparánachtaí d’Ealaíontóirí (an Scéim Sparánachta d’Ealaíontóirí Cruthaitheacha, an Scéim Ealaíontóirí i Scoileanna, an Sparánacht um Chamchuartaíocht agus Taispeántais Idirnáisiúnta, Sparánacht Ionad Tyrone Guthrie, Sparánacht Fhondúireacht Ealaíne Bhaile an Ghleanna, Sparánacht Chónaitheachta Centre Culturel Irlandais Chomhairle Contae Chorcaí). Ba cheart dóibh siúd a bhfuil spéis acu ann teagmháil a dhéanamh le arts@corkcoco.ie chun clárú do na seisiúin eolais.

Chun bacainní ar an rannpháirtíocht a bhaint, glacfaidh Comhairle Contae Chorcaí le hiarratais físeáin nó fuaime ar an tairseach ar líne freisin. Tabharfaidh an Oifig Ealaíon cúnamh d’iarratasóirí i gcás ina mbeadh tuilleadh tacaíochta i dtaobh inrochtaineachta de dhíth.

Is féidir iarratais a dhéanamh ar líne idir an 11 Samhain 2024 agus an 9 Eanáir 2025.

Tá treoirlínte le fáil ar an rannóg ‘Ealaíona’ de shuíomh gréasáin Chomhairle Contae Chorcaí www.corkcoco.ie
Is féidir ríomhphost a chur chuig arts@corkcoco.ie nó glaoch a chur ar 021-4346210 má tá aon cheist agat faoi na scéimeanna.

Creidiúint na híomhá: Seirbhís Ealaíne Chomhairle Contae Chorcaí