Fógraítear The Ark mar Ealaíontóirí Cónaithe DCU 24/25
Íomhá le caoinchead The Ark
The Ark agus Institiúid Oideachais DCU
Roghnaíodh The Ark mar Ealaíontóirí Cónaithe na nDaoine Óga, na Leanaí agus an Oideachais don bhliain acadúil 2024/25, arna maoiniú ag an gComhairle Ealaíon.
Bhuail mic léinn ón Máistreacht Ghairmiúil san Oideachas (Múinteoireacht Bhunscoile) in DCU leis na healaíontóirí ó The Ark ar Champas Choláiste Phádraig an seimeastar seo le haghaidh ceardlann phraiticiúil inar léiríodh conas ealaín, drámaíocht agus ceol a chur i gceachtanna a bhaineann leis an athrú aeráide. Chuir na mic léinn an-aithne ar Jane Groves, Ríona Sally Hartman, agus Joanna Parkes le linn an fhómhair. D’iarr an triúr ealaíontóirí sin ar na mic léinn saoil oileáin a léiriú leis na hamharcealaíona, leis an gceol agus leis an drámaíocht – agus roinnt téamaí maidir le hinbhuanaitheacht agus leis an athrú aeráide á bhfiosrú i rith an ama! Ansin tharraing siad na saothair ar fad le chéile i gceardlann iomlánach deiridh, inar iarradh orthu smaoineamh ar na trí fhoirm ealaíne a chomhtháthú.
Mar chuid den scéim Ealaíontóra Chónaithe do Dhaoine Óga, Leanaí agus Oideachas, roghnaíodh Ionad Cultúrtha na bPáistí ag The Ark chun deiseanna ar leith agus cláir shaincheaptha a chur ar fáil do mhic léinn DCU atá i mbun staidéar ar an oideachas i rith na bliana reatha acadúla.
Dúirt Una McCabe, Scoil an Oideachais Ealaíon agus Luaile, an méid seo a leanas faoi thionchar na cónaitheachta:
“Is deis thar na bearta é seo chun acmhainní, eolas agus eispéiris a chomhroinnt idir ealaíontóirí, oideoirí múinteora agus múinteoirí faoi oiliúint agus ár dtiomantas comhroinnte, maidir le ceart an linbh i dtaobh rochtain ar ealaín agus ar chultúr mar chuid dá chuid foghlama agus forbartha, a chur chun cinn”.
Rinne Josh Bannon, mac léinn ar an Máistreacht Ghairmiúil san Oideachas (Múinteoireacht Bhunscoile), an cur síos seo ar an gceardlann: “[bhí sé] i bhfad níos taitneamhaí agus níos praiticiúla ná a bheith ag scríobh rud éigin ar do ríomhaire glúine. As measc na drámaíochta, an cheoil agus na healaíne, tagann siad ar fad le chéile. Nuair a fheicim iad ar fad le chéile, tugann sé smaointe iontacha dom don seomra ranga – is féidir mo cheacht ealaíne, mo cheacht drámaíochta agus mo cheacht ceoil a chur le chéile. Cheap mé go raibh sé go hiontach é sin a fheiceáil”.
Léigh tuilleadh faoin gcónaitheacht anseo