PlaySpaces fógartha mar an dara faighteoir de Dhámhachtain Doiciméadaithe 2026

Tá áthas an domhain ar fhoireann na Tairsí PlaySpaces, tionscadal ealaíon comhoibríoch le Scoil Náisiúnta Clochar Naomh Uinseann i gCorcaigh, faoi stiúir an amharc-ealaíontóra Chris Finnegan, a fhógairt mar an dara faighteoir de Dhámhachtain Doiciméadaithe Thairseach na nEalaíon san Oideachas.

Tá ríméad orainn go mbeimid ag tosú ag obair le faighteoirí Dámhachtainí Doiciméadaithe 2026 sna míonna atá le teacht. De réir mar a fhorbróidh a dtionscadal, beimid ag tabhairt cuairt ar “Orpheus in the Garden” i mBaile Átha Cliath agus ar PlaySpaces i gCorcaigh chun na próisis agus eispéiris chruthaitheacha taobh thiar den saothar a léiriú.

PlaySpaces – eolas faoin tionscadal

Is tionscadal ealaíon rannpháirteach ilbhlianta é PlaySpaces lena léirítear fíor-chomhoibriú idir páistí sa dearadh cathartha.

Cuireadh tús leis sa bhliain 2025 le ceardlanna cruthaitheacha ag Scoil Náisiúnta Clochar Naomh Uinseann, An Linn Dubh inar shamhlaigh páistí spásanna do pháistí amháin trí líníocht, colláis, scéalaíocht agus déanamh samhaltán.

Tháinig an comhoibriú chun cinn mar gheall ar chomhairleacht Cork Child Friendly City, rud a léirigh mian páistí do spásanna atá deartha go barántúil dóibh. Faoi stiúir an ealaíontóra Chris Finnegan i gcomhpháirtíocht le Féile Lár Samhraidh Chorcaí, leathnaíodh an tionscadal ag deireadh na bliana 2025 chun trí ionad Iarscoile Múin ar fud Chathair Chorcaí a chur san áireamh agus fuarthas comhairliúchán inrochtaineachta ó Ionad Crann.

Tá an próiseas atriallach agus comhoibríoch: déantar pleananna agus fréamhshamhlacha as smaointe páistí, ansin cuirtear ar ais iad le haghaidh tuilleadh comhairliúcháin. Lean daltaí ó Scoil Náisiúnta Naomh Uinseann orthu ag tástáil tograí, ag fiosrú ábhar, ag tabhairt aiseolais, agus ag múnlú féiniúlacht an tionscadail atá os comhair an phobail.

Tá sé mar aidhm ag PlaySpaces a léiriú go bhfuil na healaíona rannpháirteacha in ann caidreamh páistí leis an spás poiblí agus an saol cathartha a athrú ó bhonn – ní trí chomhairliúchán siombalach ach trí chomhoibriú leanúnach ina bhfuil fíor-thionchar ag guthanna daoine óga ar thorthaí. Seolfar conair phoiblí de spásanna súgartha i samhradh na bliana 2026 sna suíomhanna seo a leanas: Cork Opera House, The Everyman, St. Peters, Leabharlann Chathair Chorcaí agus Pailliún an Ardmhéara.

Léiriú de chuid Féile Lár Samhraidh Chorcaí, tá an tionscadal arna tacú ag an Scéim Ealaíona sa Luathfhoghlaim agus sa Luathchúram de chuid na Comhairle Ealaíon agus ag Comhairle Cathrach Chorcaí tríd an Scéim Pobal Cruthaitheach. Le tacaíocht ó Sample Studios.

Príomhealaíontóir – Chris Finnegan

Is amharc-ealaíontóir é Chris Finnegan a bhfuil duaiseanna buaite aige. Tá sé lonnaithe i gCorcaigh agus déanann sé speisialtóireacht sa chleachtas rannpháirteach le páistí agus daoine óga. Is múinteoir ealaíne iar-bhunscoile oilte é a bhfuil os cionn 10 mbliana de thaithí aige agus cruthaíonn sé taispeántais, suiteáin idirghníomhacha agus eispéiris spraíúla atá dírithe ar ghuthanna daoine óga.

I measc na saothar is déanaí a rinne sé tá an Tionscadal “this/OUR” (Gradam Thionscadail Rannpháirtíochta Ealaíon na Comhairle Ealaíon 2025), ina léirítear páistí ag súgradh i nGleann Bodhar, Oirthear Chorcaí. Tá Sparánacht do Leanaí agus Daoine Óga de chuid na Comhairle Ealaíon ag tacú le taighde sa súgradh luathbhlianta, faoi mheantóireacht an éascaitheora súgartha Penny Wilson, agus léirítear na torthaí i “Play This Way” – spás súgartha idirghníomhach luathbhlianta ag Féile Lár Samhraidh Chorcaí 2026.

Is Ealaíontóir Comhlach é Chris le Helium Arts agus chomhoibrigh sé le Comhairle Cathrach Chorcaí, SpaceFest, agus KID FUTURE LAB (Stáit Aontaithe Mheiriceá). Tá BA sa Mhínealaín ó Ollscoil Teicneolaíochta Bhaile Átha Cliath agus MA sa Ghrianghrafadóireacht aige ó Ollscoil Falmouth.

Scoil Náisiúnta Clochar Naomh Uinseann

Is scoil í Scoil Náisiúnta Clochar Naomh Uinseann ina bhfuil cruthaitheacht agus na healaíona i gcroílár na foghlama agus saol na scoile. Baineann siad sult as páirt a ghlacadh i dtionscadail chruthaitheacha lena spreagtar daltaí chun smaoineamh go samhlaíoch agus fíordhifríocht a dhéanamh sa domhan. Mar chuid den Tionscadal Playspaces, tá siad thar a bheith bródúil as a bheith ag cur le tírdhreach cultúrtha Chathair Chorcaí.

Is múinteoir í Marie O’ Shea i Scoil Náisiúnta Clochar Naomh Uinseann atá an-tugtha don chruthaitheacht agus do chomhoibriú le healaíontóirí. Spreagann Marie a gcuid daltaí a nguthanna a úsáid go muiníneach, rud a chothaíonn timpeallacht seomra ranga ina gcuirtear luach ar chruthaitheacht agus féinléiriú agus ina ndéantar iad a chomóradh.

Is Múinteoir Ranga Uathachais í Michelle Singleton atá paiseanta faoi thimpeallacht foghlama chuimsitheach, chruthaitheach agus thacúil a chruthú. Tá a cuid daltaí ag baint an-taitneamh as a bheith rannpháirteach sa Tionscadal Playspaces, agus iad ag fiosrú na samhlaíochta, na cumarsáide agus an féinléirithe trí na healaíona.

Donna Keeney – Tacaíocht Inrochtaineachta

Is ealaíontóir, éascaitheoir agus cleachtóir drámaíochta a bhfuil taithí aici í Donna. Tá baint aici leis an oideachas cruthaitheach agus leis na healaíona rannpháirteacha le breis agus deich mbliana. Tugann a saothar tús áite don rochtain, don chúram agus don chruthaitheacht spraíúil, ag cinntiú gur féidir le gach duine óg páirt fhiúntach a bheith acu agus a mhothú go n-aithnítear iad sa saothar.

Mar Oifigeach Cuimsithe ag Graffiti Theatre Company, ceapann Donna réimse leathan clár Foghlama Cruthaithí agus cuireann sí i gcrích iad agus oibríonn sí i suíomhanna iomadúla amharclainne óige, ag stiúradh clár tiomnaithe do dhaoine óga atá faoi mhíchumas nó a bhfuil riachtanais chasta acu.

Susan Holland – Léiritheoir (Féile Lár Samhraidh Chorcaí)

Is coimeádaí agus léiritheoir cultúrtha í Susan a bhfuil breis is 20 bliain de thaithí aici i réimsí na nAmharc-ealaíon, na ceardaíochta agus an dearaidh. Tá sí mar Cheann Rannpháirtíochta ag Féile Lár Samhraidh Chorcaí ón mbliain 2022 i leith. Roimhe sin, bhí sí i gceannas ar an gclár coimeádaíochta agus rannpháirtíochta ag an nGailearaí Náisiúnta Dearaidh agus Ceardaíochta. Bhí sí ina Coimeádaí Rannpháirtíochta le Dearadh Éireannach 2015 agus ina hOifigeach For-rochtana le Comhairle Dearaidh agus Ceardaíochta na hÉireann. D’fhóin sí mar Choimeádaí Gníomhach ag VISUAL Ceatharlach, agus d’oibrigh sí le EVA International, Oifig Ealaíon Luimnigh, Occupy Space, Ireland @ Venice, agus Dánlann Ealaíne Chathair Luimnigh.