Blag 1 - an Dr Francesca La Morgia, Bunaitheoir agus Stiúrthóir Mother Tongues
Teangeolaí, léachtóir agus taighdeoir is ea Dr Francesca La Morgia. Tá sí ina stiúrthóir bunaidh ar Mother Tongues áit a bhfuil sí freagrach as Foghlaim, Taighde agus Forbairt Bheartais. Bhí sí ina léachtóir le teangeolaíocht i gColáiste na Tríonóide, Ollscoil Uladh, Ollscoil Mhá Nuad agus Ollscoil Reading. Scríobh sí ar cheisteanna a bhaineann leis an imirce, leis an ilteangachas agus le spásanna idirchultúrtha. Tá Francesca ina alumnas ar an dara Scoil Samhraidh de chuid na Scéime Ealaíontóirí sa Phobal ar Éagsúlacht Chultúrtha agus Cleachtas Comhoibríoch (2019).
Conas timpeallacht atá freagrúil don chultúr a chruthú
Nuair a thosaigh mo chéad pháiste ar an mbunscoil bhí an-iontas orm cuireadh a fháil teacht in éineacht le tuismitheoirí eile agus 15 nóiméad a chaitheamh sa rang gach seachtain chun léamh le chéile i ngrúpaí beaga. Ba é sin an chead uair a shiúil mé isteach i seomra ranga ina raibh páistí 4 agus 5 bliana d’aois agus breis agus 10 dteanga éagsúla á labhairt. Bhí gach tuismitheoir an-chompordach ag labhairt lena bpaistí in Urdúis, in Arabais, i Sínis, i bhFraincis agus in Iodáilis, agus ba thapa a chuaigh na páistí i dtaithí ar an eispéireas fuaime tumthach seo.
Rinne mé staidéar ar fhorbairt teangacha sna luathbhlianta ar feadh na mblianta, thug mé cuairt ar thithe chun tástáil agus measúnú a dhéanamh ar pháistí, ach ba nuair a chonaic mé mo pháistí féin ag fás aníos ina bhféiniúlacht chultúrtha agus theanga Iodálach agus Éireannach a thuig mé an ról tábhachtach a bheadh ag phobal na scoile i bhforbairt a muiníne iontu féin mar dhaoine.
Spreag sé seo an tsuim a bhí agam i bhforbairt Mother Tongues agus é mar aidhm tacú le tuismitheoirí agus múinteoirí an leas is fearr a bhaint as éagsúlacht theanga agus chultúrtha atá i saol a bpáistí cheana féin. Ciallaíonn teagasc atá freagrúil don chultúr go ndéantar cinneadh gníomhach tairbhe a bhaint as luach cultúrtha gach páiste chun tairbhe eispéireas foghlama gach duine. Athraíonn sé an insint choitianta ar éagsúlacht chultúrtha mar dhúshlán agus athraíonn sé páistí agus tuismitheoirí ina dtoibreacha feasachta, agus a dtaithí saoil mar chuid thábhachtach den churaclam agus é ag cur bonn eolais faoi chur chuige an mhúinteora.
Mar atá amhlaidh sa seomra ranga, is dóigh liom gur gá go mbeadh athrú ar na comhráite agus ar na cuir chuige i leith éagsúlacht chultúrtha inár sochaí, agus béim níos treise ar thaithí saoil gach duine aonair mar ghné uathúil agus luachmhar i gcruthú an spáis chomónta a roinnimid.
Is dá bhrí seo a bhíonn obair Mother Tongues i bhfoirmeacha difriúla ar mhaithe le hathrú a spreagadh laistigh agus lasmuigh den seomra ranga.
Sa tsraith blaganna seo, treoróidh mé thú trí roinnt croíthionscnamh a d’fhorbair Mother Tongues chun ár misean agus ár bhfís a bhaint amach, chun scrúdú a dhéanamh ar an tslí inar féidir ealaíona san oideachas a bheith lárnach i dtógáil timpeallacht atá freagrúil ó thaobh cultúir de.
