Mé féin agus Mo Chuid Cairde

Bhí an t-am againn le linn an chláir Training of Trainers smaointe féideartha a mbeadh nasc nádúrtha acu leis an gcuraclam a phlé agus a phleanáil. Chuir Mary an rang ar leith seo ar fáil ag céim níos luaithe san oideachas bunscoile agus bhí an-aithne aici ar na cailíní mar sin. Déanaim iarracht, mar ealaíontóir, an téama a nascadh le gnéithe de mo chleachtas féin. Is príomhchuid de m’fhiosracht féin é an creideamh agus bhí sé de rún agam iniúchadh a dhéanamh air seo mar go mbeidh an chuid ba mhó díobh ag glacadh le sacraimint le linn a mbliana deiridh ar an mbunscoil. De réir mar a tharlaíonn le neart téamaí agus smaointe féideartha, bhí orm iad seo a chaitheamh in aer nuair a chas mé leis an rang agus nuair a chuir mé aithne orthu.

Cén chaoi ar forbraíodh na smaointe agus cén chaoi ar oibrigh na daoine óga, an t-ealaíontóir agus an múinteoir le chéile?

Mary Bennett, Múinteoir

Chas Helen leis an rang ar dtús agus thosaigh sí ag fiosrú cé na suimeanna a bhí acu. Bhí seisiún tosaigh álainn ullmhaithe aici inar chuir na daltaí aithne uirthi. Bhí na daltaí ar a suaimhneas faoi dheireadh sheisiún a haon agus bhí siad ag súil go mór leis an tionscadal agus gach a mbeach i gceist leis. Rinne mé féin agus Helen teagmháil lena chéile agus bhíomar in ann ár dtionscadal a nascadh leis an gcuraclam. Mar go mbíonn an iomarca ar an gcuraclam, bhí sé an-chuidiúil é seo a chomhtháthú i mbealach cruthaitheach. Bheartaíomar an tionscadal a nascadh le OSPS i dtosach chun cur le muinín na ndaltaí – agus is buntáiste iontach é seo do grúpa cailíní atá ina luathdhéagóirí.

Helen Barry, Ealaíontóir

Bhí deis agam féin agus ag Mary le linn na tréimhse sin sa samhradh tuiscint a fháil ar conas a oibrímid agus ní ba thábhachtaí ná sin bhíomar in ann tuiscint a fháil ar phearsantachtaí a chéile. Bíonn sé seo ríthábhachtach, i mo thaithí féin, d’ealaíontóir rathúil cónaitheach, go mbeadh teagmháil mheasúil ann idir an t-ealaíontóir agus an múinteoir agus go mbeadh meas ag an mbeirt ar chleachtas gairmiúil an duine eile. Sa chás seo bhí sé an-tábhachtach go leanfainn an t-eolas a bhí ag Mary ar an rang. Ba léir ón gcéad chruinniú a bhí agam leis an rang go raibh muinín agus féinmhuinín an ranga sách íseal. Thaitin na rudaí aeistéitiúla liom féin agus le Mary agus cé go raibh easpa muiníne ag Mary anois is arís maidir lena cumas ealaíonta, bhí sí díograiseach agus ghlac sí le scileanna nua agus le gach rud a rinneamar agus rinne na leanaí amhlaidh ina diaidh.

Bhí mé féin agus Mary in ann clár cruthaitheach a phleanáil arís i ndiaidh mo chéad chruinnithe leis an rang agus díríodh ar fhéinmhuinín a thógáil sna leanaí i gcaitheamh na bliana sa chlár nua seo.

Cén taithí phearsanta a bhí agat i leith an tionscadail i dtéarmaí ratha agus dúshlán?

Mary Bennett, Múinteoir

D’fhoghlaim mé go leor ón taithí seo agus go ginearálta bhí sé an-dearfach agus an-tairbhiúil dom féin mar mhúinteoir agus do na daltaí. Bhí mé i bhfad ní ba mhuiníní faoi na cineálacha ealaíon a d’fhiosraíomar a theagasc faoi dheireadh an togra. Bhí ní ba mhó muinín ag na daltaí as a gcumas féin agus bhí siad an-bhródúil as na saothair a chruthaigh siad.

An t-aon dúshlán amháin a bhí agam ná glacadh leis an tábhacht, ar bhealach, a bhaineann le ligean don tionscadal é féin a stiúradh. Rinneamar athmheasúnú thart ar gach seachtain agus bheartaíomar cén áit a rachaimis bunaithe ar rud a phléigh na daltaí nó a thaitin leo nó ar rud a rith linn mar ghairmithe. Tá sé de nós againn mar mhúinteoirí a bheith an-eagraithe maidir leis an bpleanáil agus is maith linn rudaí a phleanáil seachtainí roimh ré. Mar sin, bhí sé an-deas ligean don chruthaitheacht a bheith i gceannas ar an bpleanáil agus deis a thabhairt do na daltaí a bheith páirteach sa chinnteoireacht sin.

Helen Barry, Ealaíontóir

Bhain mé an-taitneamh as oibriú ar an tionscadal seo agus as bheith ag breathnú air agus é ag fás agus ag forbairt ag an am céanna is a bhí muinín agus féinmhuinín na leanaí ag fás. Bhain an tionscadal an-tairbhe as an am a cuireadh ar fáil don mhúinteoir agus don ealaíontóir aithne a cur ar a chéile. An dúshlán ba mhó a bhí orm ná an smaoineamh ar leith a bhíodh agam féin a fhágáil ag doras an tseomra ranga.

Cén tábhacht a bhain leis an tionscadal duit ar fiú a roinnt?

Mary Bennett, Múinteoir

Chruthaíomar taispeántas den chéad scoth. Tosaíodh an taispeántas lenár bportráidí ach ní raibh ansin ach tús an tsaothair agus chuireamar leis arís agus arís le linn na bliana. Léirigh sé sin dom an tábhacht a bhaineann leis an bpróiseas seachas an táirge. Ba chúis iontais dom chomh simplí is a bhí sé ligean do chomhráite simplí leis na daltaí an tionscadal a stiúradh. Nuair a choinnítear do chluasa ar oscailt, cloistear neart rudaí a stiúrfaidh an tionscadal in áit a bhfuil suim ag na leanaí ann agus dá bhrí sin beidh an-mhórtas acu as.

Helen Barry, Ealaíontóir

Bíonn an fuinneamh i ngach rang éagsúil agus fiú má fheiceann an t-ealaíontóir go bhfuil naisc láidre le tionscadal féideartha lena f(h)iosracht féin sa stiúideo, bíonn sé ríthábhachtach stopadh agus tuiscint a fháil ar an áit a bhfuil an múinteoir agus an rang féin. Is é an fhírinne gur threoraigh na daltaí treo an tionscadail agus bhain mé taitneamh as an bpróiseas sin agus ligean dó dul chuig áit nach raibh smacht chomh dlúth sin agam air.

Ar athraigh aon rud i do chuid oibre mar gheall ar an tionscadal?

Mary Bennett, Múinteoir

D’éirigh mé i bhfad níos fearr faoi bheith solúbtha agus gan a bheith dírithe ar aon phlean amháin agus d’fhoghlaim mé go mbeidh orm glacadh le hathruithe nuair atáim ag oibriú ar thionscadal fadtéarma agus go bhfuil an próiseas sin ceart go leor. D’fhoghlaim mé ó Helen gur codanna den phróiseas cruthaitheach iad an tástáil agus an earráid. Bhí sé go hiontach go raibh na leanaí in ann é sin a fheiceáil agus taithí a fháil air chomh maith. Táim níos compordaí rudaí nua a thriail tar éis oibriú le Helen. Ba dheis den chéad scoth a bhí ann agus bhí mé an-bhuíoch go raibh an deis agam páirt a ghlacadh ann.

Helen Barry, Ealaíontóir

Caithim níos mó ama ag éisteacht leis an múinteoir seachas a bheith á bhá le smaointe.